Lapiz lazuli er verðmætt grýti eða steinn sem er aðallega að finna í Afganistan. Á miðöldum var steinninn mulinn niður og notaður sem blá málning en var það einungis á færi færustu málara og finnst meðal annars í mörgum verkum Michelangelo. Hann var einnig notaður í hverskyns skartgripi og húsgögn fyrir aðalsfólk. Ljóðið að neðan varð til þegar fréttir bárust af því að leifar af þessum dýrmæta blálit hafi fundist í tönnum í beinagrind konu sem uppi var á miðöldum í Dalheim í Þýskalandi. Var það talin vísbending um að hún hefði skrifað og myndlýst handrit en verið þurrkuð úr sögunni eins og margar kynsystur hennar. 

Lapis lazuli

hugsa til þín systir 
með hafið í penslinum 
rándýrt himnarykið
heiðríkjuna sjálfa

hugsa um tungu þína
væta helgasta litinn
heitar varir
hvessa drættina

þú myndlýstir helgirit
öðrum betur
munstraðir skinnið
fínbláum línum

hugsa um strit þitt
mulinn stein, Maríuklæði
hafblik í tönnum þínum
þúsund árum síðar

Tweet

Taktu þátt í að halda Flóru starfandi. Með því að styrkja Flóru útgáfu eflir þú jafnrétti og fjölbreytni í íslenskum fjölmiðlum, styður við nýsköpun kvenna ásamt því að verða hluti af okkar sívaxandi samfélagi.

fyrri grein:
Mýkt er máttur

Mest lesin:
Þurfa menn kannski bara að vera duglegri að axla ábyrgð?

Mælum með:
Feminist Farming Project

næsta grein:
Femínísk útópía hvað?